0
Hér á Málefnunum er töluvert um stuðningsfólk Frjálslynda flokksins en einnig nokkrir sem styðja flokkinn í málflutningi innflytjenda þó þeir fylgi öðrum flokkum. Í síðari flokknum dettur mér í hug menn eins og Járnkarlinn, Rimmi og Reily svo einhverjir séu nefndir. Í þeim hópi er Grandvar líka ef ég man rétt. Þetta fólk hefur haldið því fram að umræða Frjálslyndra sé bara nauðsynleg varnaðarorð meðan við hin þykjumst hafa séð í þeim sama málflutningi tilhæfulausan hræðsluáróður, eins og Orville gamli hefur stundum orðað það.
Ég birti hér á öðrum þræði nýlegan pistil sem Viðar Helgi skrifar á bloggsíðu ungra Frjálslyndra og bið nú um umræður og viðbrögð við þeim pistli. Viðar þessi er formaður ungra Frjálslyndra og hefur nýlega hlotið kosningu í hina fjölskipuðu stjórn borgarmálafélags Frjálslynda. Viðar hefur verið hvað duglegastur forsvarsmanna flokksins að fjalla um málefni innflytjenda en hefur gjarnan fengið ágætan stuðning meðal helstu forsvarsmanna. Ekki rekur mig minni til þess að nokkur í þeim hópi hafi gagnrýnt málflutning Viðars nema siður sé, ef frá er talinn Kristinn H. Gunnarsson sem taldi að Viðar væri að ala á fordómum.
Þennan pistil má finna hér: http://luf.blog.is/blog/luf/entry/582616/
Hér er svo pistillinn í heild:
Menningarlegur stöðugleiki
Menningarlegur stöðugleiki er grundvöllur sameiningar og stuðlar að auknum framförum þjóðarinnar. Til þess að viðhalda menningarlegum stöðugleika er mikilvægt að stefna ríkisins í málefnum útlendinga sé skýr.
Fyrir stuttu lagði ég það til við Landsráð Frjálslynda flokksins að Frjálslyndi flokkurinn leggi grundvallaráherslu á að íslenska þjóðin hafi ávallt stjórn á því hverjir og hversu margir útlendingar ákveða að flytjast hingað til skemmri eða lengri tíma.
Annars þurfa þeir sem fara með vald þjóðarinnar að gera sér grein fyrir vilja þjóðarinnar og hætta að fara hvað eftir annað gegn vilja hennar.
En hver er vilji þjóðarinnar?
Hvað vill þjóðin?
Hvað viljum við Íslendingar þegar kemur að málefnum flóttamanna? Hvað viljum við þegar kemur að málefnum farandverkamanna? Hvað viljum við þegar kemur að málefnum nýbúa? Hvað viljum við þegar kemur að málefnum ferðamanna?
Hvað viljum við Íslendingar þegar kemur að skólakerfinu? Viljum við fá sama upplausnarástand í íslenska skólakerfið eins og ríkir í Bretlandi þegar enskumælandi kennari þarf jafnvel að kenna bekk sem talar 20 mismunandi tungumál og ekkert af því er enska. Hér á Íslandi eru þess dæmi um að 3-4 tungumál séu töluð í sama bekknum. Er slíkt álag á kennara eitthvað sem við viljum? Er slíkt álag bjóðandi okkar börnum? Er slík námsskerðing bjóðandi íslenskum börnum?
Hvað viljum við Íslendingar þegar kemur að heilbrigðiskerfinu? Viljum við svipað ástand á íslenskum sjúkrahúsum og er í sjúkrahúsum Englands? Viljum við að eldri borgarar séu settir á enn lengri biðlista? Við höfum bara ákveðið mikið af fagmenntuðu fólki í heilbrigðisgeiranum og við getum ekki séð tugþúsundum manna aukalega fyrir heilbrigðisþjónustu.
Hvað viljum við Íslendingar þegar kemur að réttindum íslenskra verkamanna? Viljum við áframhaldandi ógnarjafnvægi þar sem íslenski launamaðurinn hefur engin vopn í hendi sér á meðan atvinnurekandinn getur alltaf fundið ódýrari hæfari starfsmann í gegnum hið frjálsa flæði erlendra verkamanna? Viljum við skert lífskjör íslenskra launamanna? Viljum við sama ástand hér eins og í Skotlandi þar sem enginn kemst yfir lágmarkstaxta?
Hvað viljum við Íslendingar þegar kemur að atvinnuleysisbótum? Viljum við leyfa farandverkamönnum að taka atvinnuleysisbætur? Hvað viljum við að einstaklingur þurfi að hafa verið búsettur hér lengi til þess að fá aðgang að atvinnuleysisbótum?
Hvað viljum við Íslendingar þegar kemur að glæpum útlendinga? Viljum við áframhaldandi aukningu á glæpum? Viljum við aukna skipulagningu í fíkniefnaheiminum? Viljum við aukna tíðni erlendra glæpahringa sem stunda mansal, fíkniefnasölu, líkamsmeiðingar og pyntingar? Viljum við að erlendir axa- eða sveðjumorðingjar geti leitað sér athvarfs á Íslandi?
Hvað viljum við Íslendingar þegar kemur að aðlögun og skildum innflytjenda? Viljum við enda með sama menningarlega óstöðugleika og nágrannaþjóðir okkar þar sem stór hluti innflytjenda og jafnvel innfæddra barna og barnabarna neitar að aðlagast samfélaginu? Hvaða skyldur viljum við setja þeim sem fá leyfi til þess að setjast hér að, hvort sem við köllum þá landnema eða innflytjendur.
Það er bara tímaspursmál hvenær strangari innflytjendastefna sem byggir á fjöldastýringu verður lögfest.
Af hverju ekki að koma með hana áður en allt fer á versta veg og menningarlegi óstöðugleikinn hefur étið upp sameiningu landans?
Viðar Helgi Guðjohnsen
Nú langar mig að fá upp umræður um þennan pistil og varpa í því sambandi fram hér spurningum sem Gmaria treysti sér ekki til að svara á öðrum þræði. Mig langar sérstaklega að biðja þá sem hafa sagt mig vera með ósanngjarna gagnrýni á Frjálslynda flokkinn að svara þessum spurningum. Í leiðinni ætla ég að forðast stóryrði á þessum þræði heldur reyna að fá botn í þessi mál og ræða þau á málefnalegum og afslöppuðum nótum og vona að aðrir geri það líka. Ég mun þó ef til vill koma með fleiri tilvitnanir í forsvarsmenn flokksins ef þurfa þykir og umræður verða markvissar og málefnalegar.
Stundum er talað um þöggun í tengslum við þessa umræðu. Nú skulum við reyna að ræða málin og forðast þessa meintu þöggun. Til að svo meigi vera verða þó stuðningsmenn Frjálslyndra að þora að svara þeim spurningum sem til þeirra er beint og svo hægt sé að kryfja til mergjar hvað flokkurinn er að fara í innflytjendamálum.
En hér eru þá spurningarnar sem ég vil byrja á að bera upp og vona að sem flestir svari samkvæmt sinni bestu sannfæringu.
- Ertu sammála því sem fram kemur í þessum pistili?
- Eru þær skoðanir sem þarna eru settar fram í samræmi við stefnu Frjálslynda flokksins?
- Telur þú að eitthvað sem sett er fram í eftirfarandi pislti sé til þess fallinn að ala á fordómum gagnvart innflytjendum?
Ps. Sérstaklega þætti mér gott að frá svör frá Cesil um þessi mál því hún hefur verið iðin við að ásaka mig fyrir það sem henni fynnst ósanngjörn gagnrýni og hefur í því sambandi oftlega vitnað í hina rituðu stefnu flokksins. Spurning tvö er því ekki síst beint til hennar þó auðvitað voni ég að sem flestir svari.
Niður með þöggunina og reynum að fá botn í þessi mál.
